مولود جديد للكاتبة " سلمى خالد" يصدر عن كيان اللا رواية للنشر الإلكتروني وبدعمكم قد يتحول الحلم لحقيقة وتصبح ورقى
إسم العمل : يوميات اللارواية الرمضانية
المؤلفة: سلمى خالد
دار النشر : اللارواية للنشر الالكتروني
سنة النشر : 2023
التصنيف : اسكريبت
تصميم الغلاف : ميري عماد
دخلت أعمل كنافة لأول مرة في حياتي بعد خناقة طويلة عريضة بيني وبين الحاج، المهم دخلت وجبت نص كيلو كنافة عشان اعملها بنفس وصفة بابا ليها لأن بابا كل سنة وهو اللي بيعملها، وعشان بختي اللي زي شراب رجلي قالي أنا اللي هعملها السنادي، دخلت وجبت الكنافة وعاملة اقصها فيها بالمقص ولا كأني كوافيره، واكلم الكنافة وأقول:
_ عجبتك التسريحة دي يا هانم؟
المهم بابا دخل عليا المطبخ وسمعني وأنا بكلم الكنافة وبصلي شوية وقالي بصدمة باينة على وشه:
_ أنتِ بتكلمي الكنافة؟!
اتخضيت من دخوله المطبخ وأنا أصلا كت مديه ضهري للباب، المهم قولتله:
_ لا طبعًا كنافه اللي بكلمها، روح ارتاح يا حاج دي تهيؤات صيام.
راح هرش راسه كده ومشي من المطبخ وصدق إنها تهيؤات وأنا كملت الكنافة اللي ما يعلم بيها إلا ربنا، المهم فضلت فيها من ساعة الضهر لحد العشا وأنا بعمل فيها وأخيرًا بعد معاناة خلصت، روحت بكل الفخر اللي في العالم كله خارجة لبابا بقوله وأنا ماسكة الصينية بايدي والسكينة:
_ قطع و دوق عمايل الشيف سلمى.
بابا من كتر الفخر اللي شافه حس إنه هياكل كنافة من ايتوال، وياريته ما حس بكده.
فضل يدخل السكينة يقطع والسكينة مش راضية وكأنه بيدخلها في أرض بايرة، استغرب شوية وفضلنا يجي نص ساعة مفيش فايدة راح جاب الشاكوش وحط السكينة على الكنافة ويضرب بالشاكوش، لحد ما كسرها خالص.
بابا خرج حتة كبيرة كده وبيبص بصدمة ويقول:
_ أنت حطيتي شربات ولا جبس؟
ابتسمت بتوتر شوية وقلتله:
_ سكر يا بابا عادي.
:_ امال ايه الجبس دا، أنتِ عايزاني أبات عند دكتور الاسنان النهاردة.
_ يا بابا ما حاولت معاها وكلمتها واتناقشنا عشان تطلع حلوة... بص هات مايه وبلها كده وهي بإذن الله هتتاكل.
:_ ليه بطة قدامك وهتبلي ليها الاكل، آخر مرة تدخلي المطبخ مخدتش منك حاجة غير خسرة السكر والكنافة.
_ الله يا بابا ما قولتلك مليش في المطبخ واصريت إني ادخل عشان أعملك الكنافة وادي النتيجة.
_ عشان متربتش يا حبيبتي وخليتك تدخلي اهو خسرت كيلو سكر ونص كيلو كنافة، عوض عليا عوض الصابرين يارب.